ភ្នំពេញ៖ អតីតមន្ត្រីនគរបាលម្នាក់ ដែលមានជំងឺបាក់ទឹកចិត្ត និងជំងឺប្រចាំកាយ បានយកកាំភ្លើងបាញ់សម្លាប់ខ្លួនឯងស្លាប់ ក្បែរផ្លូវ៦០ម៉ែត្រ (ក្រោយផ្សាររាត្រី៦០ម៉ែត្រ) កាលពីព្រឹកថ្ងៃទី១៨ ខែឧសភា ឆ្នាំ២០២៦។
ហេតុការណ៍ដ៏សោកសៅនេះ បានកើតឡើងនៅវេលាម៉ោង៥ និង២០នាទីព្រឹក ថ្ងៃទី១៨ ខែឧសភា ឆ្នាំ ២០២៦ ស្ថិតនៅក្បែរផ្លូវ៦០ម៉ែត្រ (ក្រោយផ្សាររាត្រី៦០ម៉ែត្រ) សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។
បើតាមប្រភពពីសាច់ញាតិរបស់ជនរងគ្រោះ បានឱ្យដឹងថា បុរសវ័យចំណាស់រូបនេះ ធ្លាប់បម្រើការជាមន្ត្រីនគរបាល មានជំងឺប្រចាំកាយ រួមទាំងជំងឺបាក់ទឹកចិត្តផង។ មុនពេលកើតហេតុ គាត់បានសរសេរសំបុត្រផ្ដាំផ្ញើទុកឱ្យគ្រួសារ សុំឱ្យយកសពទៅធ្វើបុណ្យតាមប្រពៃណី រួចជិះម៉ូតូអាគុយចេញពីផ្ទះតែម្តង។
សាច់ញាតិបានបន្តថា រហូតដល់មានសមត្ថកិច្ចទាក់ទងមក ទើបគ្រួសារដឹងពីហេតុការណ៍ និងរកឃើញសពជនរងគ្រោះស្លាប់ក្នុងថ្លុកឈាម។
បច្ចុប្បន្ន សមត្ថកិច្ចជំនាញបានចុះមកធ្វើការត្រួតពិនិត្យស្ថានកន្លែងកើតហេតុ និងកោសល្យវិច័យសព រួចប្រគល់សពជូនសាច់ញាតិយកទៅធ្វើបុណ្យតាមប្រពៃណីរួចរាល់ហើយ៕
