ស្របពេលពិភពលោកកំពុងប្រឈមនឹងវិបត្តិថាម ពលធ្ងន់ធ្ងរ ដែលបណ្តាលមកពីជម្លោះនៅមជ្ឈិមបូព៌ាជាពិសេសសង្គ្រាមរវាងអ៊ីរ៉ង់ជាមួយសហ រដ្ឋ អាមេរិក និងអ៊ីស្រាអែល ប្រទេសបង់ក្លាដែសក៏កំពុងរងផលប៉ះពាល់ខ្លាំងពីកង្វះខាតប្រេងឥន្ធនៈ និងតម្លៃសាំងឡើងថ្លៃ។ ដើម្បីសន្សំសំចៃថាមពល រដ្ឋាភិបាលបង់ក្លាដែសបានសម្រេចបិទសាកលវិទ្យាល័យសាធារណៈ និងឯកជនទាំងអស់ជាបណ្តោះអាសន្ន ចាប់ពីថ្ងៃចន្ទ ទី៩ ខែមីនា ឆ្នាំ ២០២៦។
តាមការផ្សាយពីប្រភពដ៏គួរឱ្យទុកចិត្តដូចជា Reuters, Al Jazeera និង TRT World ក្រសួងអប់រំបង់ក្លាដែសបានចេញសេចក្តីប្រកាស ថា សាកលវិទ្យាល័យទាំងអស់នឹងត្រូវបិទទ្វារជាបណ្តោះអាសន្ន ដោយបង្ខំចិត្តនាំមុខវេន ឈប់ សម្រាក Eid al-Fitr ដើម្បីកាត់បន្ថយការប្រើប្រាស់អគ្គិសនី និងប្រេងឥន្ធនៈ។ វិធានការនេះមិនត្រឹមតែជួយសន្សំអគ្គិសនីប៉ុណ្ណោះទេ ថែមទាំងកាត់បន្ថយការកកស្ទះចរាចរណ៍ ដែលនាំឱ្យមានការខ្ជះខ្ជាយប្រេងសាំងផងដែរ។
មុននេះ សាលារៀនរដ្ឋ និងឯកជនជាច្រើនបាន បិទទ្វាររួចហើយ ដោយសារវិបត្តិថាមពល និងការឈប់សម្រាក Ramadan ធ្វើឱ្យវិស័យអប់រំទូទាំងប្រទេសជាប់គាំងយ៉ាងខ្លាំង។ ប្រទេសបង់ក្លា ដែសពឹងផ្អែកលើការនាំចូលថាមពលប្រមាណ ៩៥% ដូច្នេះការរំខាននៅទីផ្សារថាមពលសកលបានប៉ះពាល់ដល់ខ្លាំង។ រដ្ឋាភិបាលក៏បានដាក់កម្រិតលក់ប្រេងឥន្ធនៈប្រចាំថ្ងៃ បន្ទាប់ពីមានការទិញជាបន្ទាន់ និងស្តុកទុកពីប្រជាពលរដ្ឋ។
បើតាមទិន្នន័យថ្មីៗ តម្លៃសាំងនៅបង់ក្លាដែសក្នុង ខែមីនា ឆ្នាំ២០២៦ នៅតែរក្សាស្ថិរភាព ដោយសាំងមួយលីត្រមានតម្លៃប្រមាណ ១១៦ ទៅ ១២០ តាកា (ឬប្រហែល ៥,០០០ ទៅ ៥,៥០០ រៀលខ្មែរ អាស្រ័យលើអត្រាប្តូរប្រាក់)។ ទោះជាយ៉ាងណា ស្ថានភាពសកលកំពុងធ្វើឱ្យមានការព្រួយបារម្ភថា តម្លៃអាចកើនឡើងបន្ថែមទៀត។
ទន្ទឹមគ្នានេះ ប្រទេសវៀតណាម ដែលស្ថិតនៅជិតខាងកម្ពុជា ក៏កំពុងអនុវត្តវិធានការសន្សំសំចៃស្រដៀងគ្នា។ ក្រសួងឧស្សាហកម្ម និងពាណិជ្ជ កម្មវៀតណាមបានចេញសេចក្តីណែនាំឱ្យក្រុមហ៊ុន និងសហគ្រាសអនុញ្ញាតឱ្យបុគ្គលិកធ្វើការពីផ្ទះ ដើម្បីកាត់បន្ថយការធ្វើដំណើរ និងការប្រើប្រាស់ប្រេងសាំង ដែលកំពុងហក់ឡើងខ្ពស់ដោយ សារជម្លោះមជ្ឈិមបូព៌ា។ ក្រសួងក៏បានអំពាវនាវ ឱ្យប្រជាពលរដ្ឋ និងអាជីវកម្មកុំភ័យស្លន់ស្លោ ឬស្តុកទុកប្រេងឥន្ធនៈ ហើយរាយការណ៍បន្ទាន់បើមានស្ថានីយប្រេងណាលក់ខុសច្បាប់ ឬលាក់ទុក។
វិបត្តិនេះបង្ហាញពីផលប៉ះពាល់ជាសកលនៃជម្លោះនៅមជ្ឈិមបូព៌ា ដែលធ្វើឱ្យប្រទេសកំពុងអភិវឌ្ឍន៍ជាច្រើនត្រូវបង្ខំចិត្តអនុវត្តវិធានការបន្ទាន់ដើម្បី រស់រានមានជីវិត។ ស្ថានភាពនៅបង់ក្លាដែស និងតំបន់ជុំវិញនៅតែត្រូវតាមដានយ៉ាងដិតដល់ខណៈ ពិភពលោកកំពុងរង់ចាំដំណោះស្រាយសម្រាប់ វិបត្តិថាមពលនេះ។
