បែលហ្ស៊ិក៖ មានការបញ្ជាក់ពីការស្លាប់២នាក់ ដោយសារវីរុស West Nile ដែលជាជំងឺឆ្លងតាមរយៈសត្វមូស នាថ្ងៃទី១៥ ខែតុលា ឆ្នាំ២០២៦នេះ នៅតំបន់ Flanders របស់ប្រទេសបែលហ្ស៊ិកហើយបច្ចុប្បន្ន កំពុងរីករាលដាលពាសពេញទ្វីបអឺរ៉ុប។
វីរុសនេះអាចបង្កឱ្យមានរោគសញ្ញាស្រដៀងនឹងជំងឺផ្តាសាយ ប៉ុន្តែក្នុងករណីធ្ងន់ធ្ងរ វាអាចបណ្តាលឱ្យមានអាការៈ«ញ័រខ្លួន គ្រុនក្តៅ សន្លប់ និងការហើមជាលិកាខួរក្បាល ឬហៅថា រលាកខួរក្បាល ដែលអាចបណ្តាលឱ្យស្លាប់។ វាក៏អាចបង្កឱ្យមានជំងឺរលាកស្រោមខួរក្បាលផងដែរ។
យោងតាមប្រព័ន្ធផ្សព្វផ្សាយក្នុងស្រុក បានឱ្យដឹងថា តំបន់ភាគខាងជើងនៃប្រទេសបែលហ្ស៊ិកមួយនេះ បានបញ្ជាក់ពីការឆ្លងចំនួន ១៤ករណី ក្នុងនោះស្លាប់២ករណីនេះ។
មជ្ឈមណ្ឌលអឺរ៉ុប សម្រាប់ការការពារ និងគ្រប់គ្រងជំងឺ បានឱ្យដឹងនៅសប្តាហ៍មុនថា ប្រទេសនៅតំបន់អឺរ៉ុបចំនួន ១៨ បានកត់ត្រាការឆ្លងជាង ១.៨៥០ករណី៕
