ភ្នំពេញ៖ ក្នុងកម្មវិធី “Smile Asia Charity Gala 2025” កាលពីយប់ថ្ងៃទី១៤ សីហា លោកស្រី ពេជ ចន្ទមុន្នី ភរិយាសម្ដេច ហ៊ុន ម៉ាណែត នាយករដ្ឋមន្រ្តី បានថ្លែងសារសន្ដិភាពទៅកាន់អ្នកចូលរួម និងពិភពលោក ក្រោយលោកស្រីទទួលបានពានរង្វាន់“Smile Asia Philanthropic Visionary Award”។ ពីប្រទេសសិង្ហបុរី ភរិយានាយករដ្ឋមន្រ្តីកម្ពុជា ថ្លែងថា កម្ពុជាត្រូវការសន្តិភាព មិនត្រូវការសង្រ្គាមឡើយ។
លោកស្រី ពេជ ចន្ទមុន្នី ចាត់ទុកពានរង្វាន់ “Smile Asia Philanthropic Visionary Award” ជាកិត្តិយសមួយដ៏អស្ចារ្យ លើសពីអ្វីដែលអាចពណ៌នាបាន។ លោកស្រី បន្តថា ពានរង្វាន់នេះ មិនត្រឹមតែជាការឆ្លុះបញ្ចាំងពីការលះបង់របស់លោកស្រីប៉ុណ្ណោះទេ តែជាគុណតម្លៃចំពោះប្រជាជនកម្ពុជាទាំងអស់។ លើសពីនេះ លោកស្រី មានមោទកភាពដែលតំណាងឱ្យប្រជាជន និងកុមារកម្ពុជា ជិតមួយលាននាក់ ដែលទទួលបានអត្ថប្រយោជន៍ដោយផ្ទាល់។
តាមរយៈសេចក្ដីថ្លែងសារក្នុងកម្មវិធី “Smile Asia Charity Gala 2025” លោកស្រី ពេជ ចន្ទមុន្នី បានរំលេចពីហេតុការណ៍ដែលកម្ពុជាកំពុងជួបប្រទះ គឺបញ្ហាជម្លោះព្រំដែនកម្ពុជា-ថៃ។«ពាក្យពេចន៍ទាំងឡាយ ដែលបានថ្លែងនៅពេលនេះ គឺដើម្បីផ្សាមុខរបួស ព្រមទាំងនាំសន្តិភាពរវាងកម្ពុជា-ថៃ។»។ នេះជាការលើកឡើងរបស់លោកស្រី ពេជ ចន្ទមុន្នី ដោយបញ្ជាក់ថា កម្ពុជា តែងតែប្រកាន់គោលជំហរសន្តិភាព។
នៅចំពោះអ្នកចូលរួមក្នុងកម្មវិធីខាងលើ លោកស្រី ពេជ ចន្ទមុន្នី បង្ហាញការជឿជាក់លើការដោះស្រាយបញ្ហាតាមរយៈកិច្ចសន្ទនាដោយការយោគយល់គ្នា និងផ្អែកលើគោលការណ៍ច្បាប់អន្តរជាតិ។ ទន្ទឹមនឹងនេះ ស្រ្តីទី១កម្ពុជា ប្រឆាំងដាច់ខាតចំពោះការប្រើប្រាស់កម្លាំងប្រដាប់អាវុធ ដែលនាំមកនូវការឈឺចាប់ និងអន្តរាយ។
លោកស្រី ពេជ ចន្ទមុន្នី បានចែករំលែកពីសកម្មភាពចុះទៅកាន់តំបន់ជនភៀសសឹក ជួបគ្រួសារទាហានពលីជីវិត និងរងរបួសនៅតាមមន្ទីរពេទ្យ ដែលផ្ទះ និងទីជម្រករបស់ពួកគេត្រូវបានបំផ្លាញទាំងស្រុង។ អ្វីដែលធ្វើឱ្យស្រ្តីទី១កម្ពុជា រំជួលចិត្តនោះ គឺទឹកមុខរបស់កុមាររងគ្រោះជាដើម។
លោកស្រី ថ្លែងថា៖«ខ្ញុំបានឃើញទឹកមុខរបស់កុមារ ដែលបានតម្រង់ជួរចាំទទួលអាហារ។ កុមារទាំងនោះ បានចាកចេញពីសាលារៀនដែលខូចខាត ទាំងដែលពួកគាត់ គួរណាស់តែកំពុងរត់លេងក្នុងភូមិរបស់ពួកគេ»។
ក្រៅពីនេះ លោកស្រី ពេជ ចន្ទមុន្នី ក៏ប្រាប់ទៅពិភពលោកពីទុក្ខលំបាករបស់ស្រ្តីជាម្ដាយ ដែលត្រូវព្រាត់ប្រាស់ពីគ្រួសារ និងមនុស្សជាទីស្រឡាញ់ ដោយសារជម្លោះព្រំដែននេះ។ លោកស្រី ទទួលស្គាល់ថា ប្រជាជននៃប្រទេសទាំងពីរ ជាអ្នករងទុក្ខវេទនាអំពីការភៀសខ្លួននេះ។
បើតាមស្រ្តីទី១ កម្ពុជាកំពុងរស់នៅក្រោមស្រមោលនៃបទឈប់បាញ់ដ៏ផុយស្រួយជាទីបំផុត។ លោកស្រី បន្តថា យើងចង់ឃើញស្នាមញញឹមនៅលើផ្ទៃមុខរបស់កុមារទាំងឡាយ ជាជាងទឹកភ្នែកដែលស្រក់ដោយការបាត់បង់។ លើសពីនេះ យើងចង់ឃើញប្រជាជនកសាងអនាគតដ៏ភ្លឺស្វាងមួយ មិនមែនត្រូវភៀសខ្លួនចេញពីលំនៅដ្ឋានឡើយ។
«យើងចង់បានសន្ដិភាព យើងមិនត្រូវការសង្រ្គាមឡើយ»។ នេះជាសារចុះក្រោយរបស់លោកស្រី ពេជ ចន្ទមុន្នី ដោយបង្ហាញជំនឿថា ប្រជាជនប្រទេសទាំងពីរ ចង់បានអនាគតដ៏ត្រចះត្រចង់ដូចគ្នា ជាពិសេសការការពារជីវិតរស់នៅ ការរក្សាសន្តិភាព និងបង្ហាញពិភពលោកឃើញថាប្រទេសទាំងពីរត្រូវការរួបរួមគ្នា៕
