ញូវដេលី៖នាយករដ្ឋមន្ត្រីឥណ្ឌា លោកនារេនទ្រា ម៉ូឌី បានព្រមានប្រឆាំងនឹងការយកបច្ចេក វិទ្យា និងរ៉ែសំខាន់ៗ (រួមទាំងរ៉ែកម្រ)មកធ្វើជាអាវុធឬឧបករណ៍សម្ពាធភូមិសាស្ត្រនយោបាយ ក្នុងកិច្ចប្រជុំកំពូល BRICS នៅញូវដេលី កាល ពីថ្ងៃអាទិត្យ ទី១៣ ខែកញ្ញា ឆ្នាំ២០២៦។
ក្នុងសុន្ទរកថាបញ្ចប់នៃកិច្ចប្រជុំ លោកម៉ូឌីបានមានប្រសាសន៍ថា៖ «ការយកបច្ចេកវិទ្យា និងរ៉ែសំខាន់ៗ មកធ្វើជាអាវុធ អាចរារាំងវឌ្ឍនភាពរួមរបស់យើង។ ដូច្នេះ យើងបានសង្កត់ធ្ងន់លើការរួមបញ្ចូលគ្នាក្នុងការទទួលយកបច្ចេក វិទ្យា»។
លោកមិនបានបញ្ជាក់ឈ្មោះប្រទេសណាមួយជាក់លាក់ទេ ប៉ុន្តែការថ្លែងនេះត្រូវបានចាត់ទុកថាជាសារដោយប្រយោលទៅកាន់ចិន ដែលគ្រប់គ្រងប្រហែល ៩០ ភាគរយនៃការកែច្នៃរ៉ែកម្រពិភពលោក។ ការថ្លែងនេះត្រូវបានធ្វើឡើងនៅចំពោះមុខប្រធានាធិបតីចិន លោកស៊ី ជីនពីង ដែលកំពុងចូលរួមកិច្ចប្រជុំដដែល។
រ៉ែកម្រ និងរ៉ែសំខាន់ៗផ្សេងទៀត (ដូចជា លីចូម នីកែល និងក្រាហ្វីត) មានសារៈសំខាន់ខ្លាំងសម្រាប់ការផលិតរថយន្តអគ្គិសនី ទួរប៊ីនខ្យល់ មជ្ឈមណ្ឌលទិន្នន័យ AI ឧបករណ៍អេឡិចត្រូនិកទំនើប និងប្រព័ន្ធការពារជាតិ។ ចិនធ្លាប់បានដាក់កម្រិតនាំចេញរ៉ែទាំងនេះ ដែលបង្កការព្រួយបារម្ភអំពីការប្រើប្រាស់ធនធានទាំងនេះជាឧបករណ៍សម្ពាធ។
លោកម៉ូឌីក៏បានលើកឡើងស្រដៀងគ្នានេះកាលពីឆ្នាំ២០២៥ ក្នុងកិច្ចប្រជុំ BRICS នៅរីយ៉ូដឺហ្សាណេរ៉ូ ដោយអំពាវនាវឱ្យគ្មានប្រទេសណា «ប្រើប្រាស់ធនធានទាំងនេះសម្រាប់ផលប្រយោជន៍ផ្ទាល់ខ្លួន ឬជាអាវុធប្រឆាំងប្រទេសដទៃ»។
ក្នុងសេចក្តីប្រកាសញូវដេលី ដែលចេញផ្សាយក្នុងកិច្ចប្រជុំនេះ BRICS ក៏បានសង្កត់ធ្ងន់លើតម្រូវការនៃខ្សែសង្វាក់ផ្គត់ផ្គង់រ៉ែសំខាន់ៗដែលមានស្ថិរភាព ចម្រុះ និងយុត្តិធម៌ ខណៈរក្សាសិទ្ធិអធិបតេយ្យលើធនធានទាំងនោះ។
