កំពង់ឆ្នាំង៖ ពិធីបើកដំណើរការការពារសារណាបញ្ចប់ថ្នាក់បរិញ្ញាបត្រ នៅសាខាពុទ្ធិកសាកលវិទ្យាល័យព្រះសីហនុរាជ ខេត្តកំពង់ឆ្នាំង ត្រូវបានរៀបចំឡើងជាផ្លូវការកាលពីព្រឹកថ្ងៃទី៥ ខែមីនា ឆ្នាំ២០២៦ នៅទីតាំងសាខាខេត្តកំពង់ឆ្នាំង។
ពិធីនេះធ្វើឡើងក្រោមអធិបតីភាពព្រះបាលិកោវិទ បណ្ឌិត ឌិត វីរៈ ព្រះសាកលវិទ្យាធិការរង ដែលជាតំណាងដ៏ខ្ពង់ខ្ពស់សម្តេចព្រះមហាអរិយវង្ស បណ្ឌិត យ៉ន សេង យៀត ព្រះសាកលវិទ្យាធិការ នៃពុទ្ធិកសាកលវិទ្យាល័យព្រះសីហនុរាជ រួមទាំងព្រះទេពមុនី សុខ ថាន ព្រះប្រធានសាខា និងឯកឧត្តម កាន់ ម៉ន រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ។
ពិធីមានការនិមន្ត និងអញ្ជើញចូលរួមពីព្រះមន្ត្រីសង្ឃខេត្ត តំណាងមន្ទីរធម្មការ និងសាសនា មន្ទីរអប់រំ យុវជន និងកីឡា អភិបាលរងក្រុងកំពង់ឆ្នាំង លោកគ្រូ អ្នកគ្រូជាគណៈកម្មការវាយតម្លៃ ព្រមទាំងសមណនិស្សិត និស្សិតប្រមាណចំនួន ២០២ អង្គ/នាក់។
ការពារសារណាបញ្ចប់ថ្នាក់បរិញ្ញាបត្រនេះ គឺជាសកម្មភាពសំខាន់មួយក្នុងការបញ្ចប់ដំណាក់កាលសិក្សាថ្នាក់បរិញ្ញាបត្រ ដែលផ្តោតលើឯកទេសពាក់ព័ន្ធនឹងពុទ្ធសាសនា ទស្សនវិជ្ជា និងវិស័យពាក់ព័ន្ធផ្សេងទៀត ដើម្បីរួមចំណែកពង្រឹងគុណភាពធម៌ និងបណ្តុះបណ្តាល សមណនិស្សិត និស្សិតឱ្យមានចំណេះដឹងទាំងផ្លូវលោក និងផ្លូវធម៌។
សាខាពុទ្ធិកសាកលវិទ្យាល័យព្រះសីហនុរាជ ខេត្តកំពង់ឆ្នាំង ជាផ្នែកមួយនៃបណ្តាញសាខាទូទាំងប្រទេស ដែលបន្តបេសកកម្មអប់រំពុទ្ធិក ស្របតាម គោលនយោបាយអភិវឌ្ឍន៍របស់រាជរដ្ឋាភិបាល និងក្រសួងពាក់ព័ន្ធ។
ពិធីបានបញ្ចប់ដោយជោគជ័យ និងបង្ហាញពីការប្តេជ្ញាចិត្តរួមគ្នាក្នុងការលើកកម្ពស់វិស័យអប់រំពុទ្ធិកនៅកម្ពុជា។
