កំពង់ឆ្នាំង៖នៅរសៀល ថ្ងៃទី១០ ខែមីនា ឆ្នាំ ២០២៦ លោក ដូវ គឹមស៊ីន អភិបាលនៃគណៈអភិបាលស្រុកជលគីរី ខេត្តកំពង់ឆ្នាំង បានដឹកនាំក្រុមការងាររបស់ស្រុក រួមជាមួយលោកគ្រូ អ្នកគ្រូ និងសិស្សានុសិស្សពីសាលាបឋមសិក្សាព្រៃគ្រីជើង ធ្វើការរៀបចំជី និងបណ្តុះដើមកូនអូយម៉ូយ (Cassia grandis) ចំនួន ១០០,០០០ ដើម។
ធ្វើការរៀបចំជី និងបណ្តុះដើមកូនអូយម៉ូយ (Cassia grandis) ចំនួន ១០០,០០០ ដើមនេះ មានគោលបំណងយកដើមកូនទាំងនេះទៅដាំតាមដងផ្លូវសាធារណៈនានាក្នុងស្រុកជលគីរី ដើម្បីបង្កើនសោភ័ណភាព ការពារបរិស្ថាន និងផ្តល់ម្លប់ដល់ប្រជាពលរដ្ឋ។ ម្យ៉ាងវិញទៀត អូយម៉ូយ ជារុក្ខជាតិលម្អដែលមានផ្កាស្រស់ស្អាត និងអាចរីកធំធាត់ ស្របតាមគោលនយោបាយបៃតងរបស់រាជរដ្ឋាភិបាល។
សកម្មភាពនេះ បានធ្វើឡើងស្របតាមការណែនាំដ៏ខ្ពង់ខ្ពស់របស់ឯកឧត្តម អភិបាលខេត្តកំពង់ឆ្នាំង ដែលតែងតែជំរុញឱ្យមានការចូលរួមពីគ្រប់ជាន់ថ្នាក់ ជាពិសេសការចូលរួមពីសហគមន៍ និងវិស័យអប់រំ ដើម្បីរួមគ្នាអភិវឌ្ឍន៍បរិស្ថានបៃតង និងនិរន្តរភាព។
